Türkiyədə baş verən zəlzələdə ölənlərin sayı 48 minə çatdı.
Bunu ölkə Prezidenti Rəcəb Tayyib Ərdoğan Hatayda çıxışı zamanı deyib.
O, 115 mindən çox yaralı olduğunu bildirib.
Qeyd edək ki, fevralın 6-da ocağı Türkiyənin Kahramanmaraş şəhərinin Pazarcık rayonunda olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub.
Zeynəb Müzəffərli
Yer üzündə həyatın yaranmasına səbəb ola biləcək zülalın bir hissəsi tapılıb.
Bu barədə Ratgers Universitetinin alimləri tədqiqat aparıblar.
Araşdırmaya görə bu kəşf sayəsində tədqiqatçılar həyatın yaranması astanasında olan planetləri müəyyən edə biləcəklər. Belə ki, alimlər müasir zülalları tədqiq etməklə işə başlayıb və onların strukturunu sadələşdiriblər.
Bir sıra eksperimentlərdən sonra tədqiqatçılar ən yaxşı namizədin “Nickelback” adı verilən peptid olduğu qənaətinə gəliblər. Peptid 13 amin turşusundan ibarətdir və iki nikel ionunu birləşdirir.
Məhz bu maddə sayəsində təxminən 3,5-3,8 milyard il əvvəl planetdə həyat yaranmağa başlayıb. Tədqiqatçıların fikrincə, nikel erkən okeanlarda geniş yayılıb. Peptidlə bağlandıqda, nikel atomları güclü katalizatorlara çevrilib, əlavə proton və elektronları cəlb edib və hidrogen qazı yaradıb. Nəticədə bu hal planetdə həyat olmasına səbəb olub.
Sevinc Hüseynova
Azərbaycanda Səhiyyənin Təminat Mərkəzi yaradılır.
Bununla bağlı Prezident İlham Əliyev müvafiq fərman imzalayıb.
Fərmana əsasən, Səhiyyə Nazirliyi öz tabeliyində “Səhiyyənin Təminat Mərkəzi” publik hüquqi şəxsi yaratmalı və bu barədə Azərbaycan Prezidentinə məlumat verməlidir.
Müəyyən edilib ki, qurumun “Publik hüquqi şəxslər haqqında” Qanunun 8.2-ci maddəsində nəzərdə tutulan təsisçisinin səlahiyyətlərini nazirlik həyata keçirir.
Qurumun saxlanılması xərcləri 2023-cü il və növbəti illərin dövlət büdcəsinin mərkəzləşdirilmiş xərclərində nazirlik üçün nəzərdə tutulmuş vəsait çərçivəsində həyata keçirilir.
Nazirlik qurumun nizamnaməsini, strukturunu, işçilərinin say həddini və əməkhaqlarının məbləğini (vəzifə maaşını, vəzifə maaşına əlavələri, mükafatları və digər ödənişləri) bir ay müddətində təsdiq etməlidir.
Qurumun dövlət qeydiyyatına alınması üçün onun nizamnaməsi təsdiq edildikdən sonra 3 (üç) gün müddətində “Hüquqi şəxslərin dövlət qeydiyyatı və dövlət reyestri haqqında” Qanunla müəyyən edilmiş qaydada tədbirlər görməlidir.
ABŞ-nin Florida ştatının sakinini “beyin yeyən amöb” öldürüb.
Florida səhiyyə mütəxəssisləri onun burun deşiklərini kran suyu ilə yuduqdan sonra amöbün orqanizminə düşdüyünü açıqlayıblar.
Dövlət Səhiyyə Təşkilatının sözçüsü xəstənin öldüyünü təsdiqləyib.
“Naegleria fowleri” adlanan təkhüceyrəli amöb beyində infeksiyaya yol açır və çox vaxt ölümcül olur. Əsasən, göl və çay kimi şirin sularda rast gəlinən təkhüceyrəli “Naegleria fowleri” yalnız burun yolu ilə orqanizmə daxil olur və insandan-insana keçmir.
Qoxu kanalına daxil olan amöblər burunun selikli qişasından keçərək qoxu siniri vasitəsilə onurğa-beyin mayesində və beyində yerləşir, ölümcül xəstəlik olan meningitin yaranmasına səbəb olurlar.
Bu amöblə yoluxan insanlarda boyun və baş ağrısı, həmçinin yüksək hərarət, ürəkbulanma və qusma kimi simptomlar özünü göstərir. Xəstələrin çoxu, adətən, bir həftə ərzində həyatını itirir. Əksər yoluxma hallarında qısa müddət ərzində şüur bulanıqlığı, koma və ölüm baş verir.
“Beyin yeyən amöb” buruna daxil olan çirkli su ilə yoluxur. Çox nadir hallarda kifayət qədər xlorlanmamış hovuzlara baş vurulması və ya burunun amöblə çirklənmiş su ilə təmizlənməsi nəticəsində bədənə daxil ola bilir.
Sevinc Hüseynova
