Qalxanabənzər vəzi xərçəngi qan analizi ilə deyil, yalnız ultrasəs müayinəsi ilə müəyyən edilə bilər.
Endokrin Cərrahiyyə mütəxəssisi Prof. Dr. Erhan Ayşan bununla bağlı açıqlama verib.
“Düyün diametri artdıqca xərçəng riski də artır. Burada kritik dəyər 4 sm-dir. Əgər düyün diametri 4 sm-ə çatıbsa, xəstə əməliyyat olunmalıdır. Çünki xərçəng riski artır. Əslində qalxanabənzər vəzi xərçəngində bir çox risk faktoru var. Bunlardan biri də ailədən və yaşadığımız coğrafiyadan gələn genetik kodlardır”,-deyə həkim bildirib.
Onun sözlərinə görə, 40 yaşından sonra mütləq ildə bir dəfə qalxanabənzər vəzin ultrasəsi aparılmalıdır.
“Düyünlərin sayı artdıqca xərçəng riski azalır. Bir və ya iki düyün olduqda xərçəng ehtimalı artır. Digər tərəfdən, qeyd etmək lazımdır ki, qalxanabənzər vəzi düyünlərinin yalnız 5 faizi xərçəng, 95 faizi isə xərçəng deyil. Təəssüf ki, qalxanabənzər vəzində düyün olan insanlar dərhal xərçəng olduğunu düşünürlər. Amma bu çox yanlışdır. Əgər düyün varsa, narahat olmayın, lakin mütləq həkim müayinəsini vaxtında aparın”,-deyə həkim qeyd edib.
Bundan başqa, mütəxəssis əlavə edib ki, qalxanabənzər vəzi düyününün diametri 4 sm olan xəstələr mütləq biopsiya və izləmə olmadan əməliyyat olunmalıdırlar. Çünki düyünün diametri böyüdükcə aparılacaq əməliyyat çətinləşir və ölçülər artır. Kiçik düyünləri olan xəstələr kiçik bir kəsiklə daha az riskli əməliyyat edilir.
Tiroid xərçəngi gizli inkişaf edən bir xəstəlikdir. Nadir hallarda səsdə dəyişiklik, udma çətinliyi, boğulma və ya boğazın daralması kimi simptomlar meydana çıxa bilər. Buna görə də mütləq ümumi müayinələri vaxtında həyata keçirmək lazımdır.
Sevinc Hüseynova
Saglamolun.Az
