COVID-19-un aşkarlanmasında 2 növ test mövcuddur: PZR testləri və COVID anticism testləri, yəni seroloji testlər. PZR testlərinin tətbiqi mövcud xəstəliyi aşkarlamaq üçün daha düzgündür. Seroloji testlər isə keçirilmiş xəstəliyin aşkarlanması üçün tətbiq olunur.
Bunu İnfeksiyon Xəstəliklər və Klinik Mikrobiologiya mütəxəssisi Nazxanım Qasımova deyib.
Onun sözlərinə görə, seroloji testlərlə qanda IgM və IgG anticismləri yoxlanılır: "IgM anticismi qanda xəstəliyin kəskin fazasında əmələ gəlir və onun aşkarlanması şəxsin hazırda xəstəliyə yoluxmasını göstərir. Amma IgG anticismi ilk simptom yaranandan 14 gün sonra yaranmağa başlayır. Bir insanın qanında IgG anticismin aşkar olunması bu şəxsin daha əvvəl virusa yoluxub sağaldığını göstərir”.
Nazxanım Qasımova bildirib ki, bu testlərin tətbiqində əsas məqsəd cəmiyyətdə xəstəliyi asimptomatik, simptomsuz şəkildə keçirənlərin sayını aşkarlamaqdır: “Çünki bir qrup insanlar heç bir simptom olmadan, yaxud minimal simptomlarla xəstəliyi keçirmiş ola bilərlər.
Orqanizmdə istənilən infeksiya ilə qarşılaşdıqdan sonra mütləq yaddaş hüceyrələri yaranır. Əgər insan COVID-19-a yoluxubsa, digər infeksiyalarda olduğu kimi ona qarşı yaranan IgG ömürlükdür və həmişə qanda aşkarlanacaq”. (Teleqraf)
Saglamolun.Az
