ELMİ ARAŞDIRMALAR QURU ƏRİYİN ORQANİZMƏ TƏSİRİNİ TƏSDİQLƏYİR
Ərik qurusu tərkibində yüksək konsentrasiyada vitaminlər, minerallar, lif və antioksidantlar saxlayan funksional qidadır. Qurudulma prosesi zamanı suyun azalması qida maddələrinin sıxlığını artırır və bu da onun bioloji dəyərini yüksəldir. Son illərdə aparılan elmi araşdırmalar quru ərəyin bir sıra sağlamlıq üstünlüklərini təsdiqləyir.
**HƏZM SİSTEMİ VƏ LİF TƏSİRİ**
Ərik qurusu həm həll olunan, həm də həll olunmayan liflə zəngindir. Bu liflər bağırsaq hərəkətlərini tənzimləyir, qəbizliyin qarşısını alır və bağırsaq mikrobiotasının balansını dəstəkləyir. Tədqiqatlar göstərir ki, kifayət qədər lif qəbulu ürək-damar xəstəlikləri və 2-ci tip diabet riskinin azalması ilə əlaqəlidir.
**ÜRƏK VƏ DAMAR SAĞLAMLIĞI**
Quru ərik kaliumun yaxşı mənbəyidir. Kalium qan təzyiqinin tənzimlənməsində mühüm rol oynayır, ürək ritmini stabilləşdirir və damarların elastikliyini qoruyur. Müasir kardioloji araşdırmalar kaliumla zəngin qidaların hipertoniyanın profilaktikasında əhəmiyyətini vurğulayır.
**GÖZ VƏ DƏRİ ÜÇÜN ANTİOKSİDANT QORUMA**
Tərkibindəki beta-karoten və vitamin A göz sağlamlığını dəstəkləyir, torlu qişanın funksiyasını qoruyur və yaşla bağlı görmə problemlərinin riskini azalda bilər. Flavonoidlər və fenolik birləşmələr hüceyrələri oksidləşdirici stressdən qoruyaraq xroniki xəstəliklərin inkişaf ehtimalını azaldır.
**QANAZLIĞI VƏ ENERJİ DƏSTƏYİ**
Ərik qurusunda mövcud olan dəmir orqanizmin oksigen daşıma qabiliyyətini yaxşılaşdırır və qanazlığının qarşısının alınmasına kömək edir. Bununla belə, quru meyvələrin şəkər tərkibi yüksək olduğuna görə gündəlik qəbul miqdarı nəzarətdə saxlanmalıdır.
Balanslı rasion çərçivəsində istehlak edildikdə ərik qurusu həm enerji mənbəyi, həm də sağlamlıq üçün dəyərli qida komponentidir.
Saglamolun.Az
