Uşaqlarınızı bu əşyadan qoruyun - Azərbaycanlı həkim (VİDEO


Uşaqlar üçün adi oyuncaq və ya kiçik bir məişət əşyası bir anda ölümcül təhlükəyə çevrilə bilər. Xüsusilə düymə batareyaları udulduqda valideynlərin vaxt itirməsi ağır daxili zədələnmələrə səbəb ola bilər. SAF Hospitalda üç batareya udan azyaşlıya təcili müdaxilə edilib.

Azyaşlı uşaq 3 ədəd batareya udduqdan sonra valideynləri tərəfindən SAF Hospitalın Təcili Tibbi Yardım şöbəsinə çatdırılıb. Müayinə zamanı batareyalardan birinin mədədə, digər ikisinin isə bağırsaqda olduğu müəyyən edilib. Təcili endoskopik müdaxilə ilə mədədəki batareya çıxarılıb. Bir neçə saatlıq müşahidədən sonra uşaq evə buraxılıb.

Bəs uşaq yad cisim udduqda valideynlər necə davranmalıdır? Hansı hallarda təxirəsalınmaz müdaxilə tələb olunur?

Mövzu ilə bağlı SAF Hospitalın Təcili Yardım Şöbəsinin həkimi Murad Abbasov bildirib ki, uşağın yad cisim udduğu məlum olduqda valideynlər ilk növbədə sakitliyini qorumalı və onun nəfəs alıb-almadığını müəyyənləşdirməlidirlər.

Həkimin sözlərinə görə, əgər uşaq ağlayırsa, səs çıxara bilirsə və göyərmə müşahidə olunmursa, valideynlər təcili tibbi yardıma müraciət etməli və uşağın nə udduğunu müəyyənləşdirməlidirlər.

Murad Abbasov qeyd edib ki, uşaq ağlaya və səs çıxara bilmirsə, nəfəs almaqda çətinlik çəkirsə və göyərməyə başlayırsa, bu, təxirəsalınmaz müdaxilə tələb edən vəziyyətdir.

Həkim bildirib ki, belə hallarda dərhal təcili yardım çağırılmalı və uşağın yaşına uyğun ilkin yardım göstərilməlidir. Bir yaşdan kiçik uşaqlara beş dəfə kürək nahiyəsinə zərbə və beş dəfə döş qəfəsinə təkan, bir yaşdan böyük uşaqlara isə beş dəfə kürək nahiyəsinə zərbə və beş dəfə qarın təkanı tətbiq edilməlidir.

Həkimin sözlərinə görə, uşaq normal nəfəs alsa belə, yad cismin udulması təhlükəsiz hesab edilə bilməz. Belə cisimlər bağırsaq keçməzliyinə, mədə və ya bağırsaq divarının zədələnməsinə, hətta deşilməsinə səbəb ola bilər. Batareyalar isə daxili orqanlarda ciddi kimyəvi yanıq yarada bilər.


VİDEO 

 

VALİDEYNLƏRƏ XÜSUSİ XƏBƏRDARLIQ: Batareya udulmasından şübhələnirsinizsə, uşağın heç bir əlaməti olmasa belə, dərhal təcili tibbi yardıma müraciət edin.
Qusdurmağa çalışmayın, yemək və içki verməyin, tibbi yardımı gecikdirməyin.

SAF Hospital Təcili Yardımla əlaqə 012 980 



Günel İbadova
Sağlamoun.az

Saglamolun.Az