Yakutiyada oftalmoloqlar gözündə bitki toxumu cücərən 42 yaşlı kişinin görmə qabiliyyətini xilas ediblər. Bu barədə Yakutiya Respublika Oftalmoloji Xəstəxanasının baş həkimi İvan Lutskan MAX sosial şəbəkəsindəki səhifəsində məlumat verib.
Pasiyentin sözlərinə görə, hadisə yay aylarında Abıyski rayonunda meşədə gəzərkən baş verib. Bu zaman ağac budağı gözünə dəyib və iltihab yaranıb. Növbəti dörd ay ərzində kişini hər gün baş ağrıları, göz daxili təzyiqin yüksəlməsi və gözündə yad cisim olması hissi narahat edib.
Kişi toxumu özü çıxarmağa çalışsa da, hər dəfə ağrı hiss edib. O, başqa bir tibb müəssisəsinə də müraciət edib, lakin müayinə zamanı həkimlər gözdəki yad cismi aşkar edə bilməyiblər.
Əməliyyatı təcili oftalmoloji yardım mərkəzinin oftalmoloq-cərrahı Yelizaveta Karpova həyata keçirib. Həkimin sözlərinə görə, yad cismin gözdə qalması buynuz qişada xoranın yaranmasına və nəticədə görmə qabiliyyətinin itirilməsinə səbəb ola bilərdi.
Bitki toxumu inyeksiya iynəsinin köməyi ilə gözdən çıxarılıb. Müdaxilədən dərhal sonra pasiyentin vəziyyəti yüngülləşib. Həkimin sözlərinə görə, toxumun kökü artıq təxminən 3 millimetr uzanmışdı. Karpova bunun öz tibbi təcrübəsində ilk belə hadisə olduğunu bildirib.
Mənbə: Yakutiya Respublika Oftalmoloji Xəstəxanasının baş həkimi İvan Lutskanın MAX sosial şəbəkəsindəki paylaşımı.
Saglamolun.Az
