BƏDƏNDƏ ÖZ-ÖZÜNƏ ƏRİYİR
Amerikalı alimlər dünyanın ən kiçik, öz-özünə əriyən buğda dənəsi ölçüsündə kardiostimulyator hazırlayıblar. Şimal-Qərb Universitetinin tədqiqatçılarının hazırladığı bu cihaz bədəndəki mayelər ilə işləyir və zamanla öz-özünə əriyir.
Cihazın cəmi 1,8 millimetr eni, 3,5 millimetr uzunluğu və 1 millimetr qalınlığı onu qeyri-invaziv şəkildə şpris vasitəsilə bədənə daxil etməyə imkan verir.
Şimal-Qərb Universitetinin alimi Con A. Rogers bildirib ki, uşaqların ürək cərrahiyyəsi kontekstində müvəqqəti kardiostimulyatorlara kritik ehtiyac var idi.
“Uşaqların təqribən 1%-i ürək qüsuru ilə doğulur. Bu miniatür cihaz anadangəlmə ürək qüsurları olan yeni doğulmuş uşaqlar üçün əvəzsizdir. Kardiostimulyatordan təxminən yeddi gün sonra xəstələrin əksəriyyətinin ürəyi öz-özünə bərpa olunacaq.”, deyə alim qeyd edib.
Saglamolun.Az
